Ka ndërruar jetë efektivi i policisë, i cili u qëllua me armë zjarri mesditën e sotme në fshatin Baltëz të Fierit.

Siç shihet në pamje, viktima qëndron i shtrirë në tokë i pajetë.

Ngjarja raportohet se ka ndodhur pas një konflikti, ndërsa ende nuk ka detaje se si ka ndodhur krimi i rëndë.

Ndërkohë është mësuar edhe identiteti i viktimës

Ai është Novruz Cenaliaj.

Njoftimi:

Fier/Informacion paraprak

Rreth orës 13:15, në fshatin Baltëz, dyshohet se gjatë një konflikti të çastit, shtetasi A. M. ka vrarë me armë zjarri shtetasin N. C., punonjës policie i Forcës së Posaçme “Shqiponja” të DVP Fier, jashtë shërbimi, por i veshur me uniformën e Policisë, pasi shkonte për të marrë shërbimin.

Menjëherë në vendngjarje janë nisur shërbimet e Policisë, Forca Kombëtare e Sigurisë, Reparti Special “RENEA”, të cilat kanë rrethuar zonën dhe vijojnë punën për kapjen e autorit.

Grupi hetimor dhe drejtues të Departamentit të Policisë Kriminale, në drejtimin e Prokurorisë, po punojnë për sqarimin e rrethanave dhe për dokumentimin ligjor të kësaj ngjarjeje.