Rrëfimi i 64-vjeçarit Shqiptar nga Puka: Vrava gruan padashje, doja të gjuaja viçin për ta futur në stallë

Një rrëfim mjaft i dhimbshëm është bërë nga Nikollë Gjet Noci nga Puka, i cili mes lotësh tregon historinë e jetës së tij. Momenti, që ka shënjuar më së shumti jetën e 64-vjeçarit është ai i rreth dy dekadave më parë, kur ka vrarë në mënyrë të paqëllimshme gruan e tij.

Ai tregon se e ka qëlluar bashkëshorten me mjet prerës padashje, duke tentuar të fustea viçin në kasollen e lopëve. Për këtë krim të kryer ai ka qëndruar mbi 6 vite në burg, teksa tashmë pas disa vitesh kërkon të gjejë një grua në televizion.

“Unë quhem Nikollë Gjet Noci, lindur dhe banuesi i fshatit Gojani i Madh, rrethi Pukë. Datëlindja ime është 1959, unë jam pensionist. Jeta ime ka qenë shumë e vështirë që në fëmijëri për shkak se regjimi na sulmoi për arsye se nuk u futëm në kooperativë dhe ai sistem mori vendim, nuk na la të punojmë.

Në vitin 1981 u fejova, isha rreth 29 vjeç dhe u njohëm me dashuri, me anë të njohjes, pamjes fizike dhe me lejen e prindërve të të dy palëve u martuam dhe kemi kaluar një jetë të lumtur. Ajo ishte shumë punëtore, shumë e zgjuar dhe unë pata një humbje shumë të madhe me vdekjen e saj.

U mundova ta respektoja në mënyrën time, kemi pasur me gruan time një harmoni shumë të madhe dhe aty më erdhi dhe humbja. Fëmijë nuk kam, nuk u realizua, iku mosha, iku jeta. Mua më respektojnë, edhe fshati më thërrasin ‘bac’, në shenjë respekti që nuk kam fëmijë. Edhe mosha 50-60 vjeçe mua më thërrasin ‘bac’, pra kanë një respekt për mua dhe unë për ata.